Qiyma kabob.
Diyorimizning har bir viloyat va tumanlarida kabobchilarimiz ushbu mazali qiyma kabobni turlicha usulda tayyorlashlari hech kimga sir bo'lmasa kerak. Misol uchun Namanganda kabob qiymasiga to'g'ralgan dumbani aralashtirish urf bo'lsa, G'ijduvonda qiymani muzlatib ikki martalab qiymalagichdan chiqazishadi, Sirdaryo va Jizzax taraflarda qiymaga non qo'shmasdan faqatgina mayda chopib suvini siqib olingan piyoz qo'shishadi ba'zi hollarda go'sht suvliroq bo'lsa qiyma oqib ketmasligi uchn un ham qo'shishadi. Biz bo'lsa bu sahifada soddaroq usulda tayyorlash xususda so'z yuritamiz.
Kerakli mahsulotlar:
1. Go'shti – 0,5 kg.
2. Charvi yog' – 200 gr.
3. Piyoz – 100-150 gr.
4. Tuz va ziravorlar ta'bga ko'ra.
5. Bir necha bo'lak non.
Tayyorlanishi:
Yuqorida sanab o'tilgan mahsulotlarni hammasini aralashtirib qiymalagichdan o'tkaziladi agarda qiymalagich ko'zi (teshigi) yirik bo'lsa ikki marta, mayda bo'lsa bir marta ham o'tkazish kifoya qiladi. Qiymaning tuz va ziravorlani tatib, kam-ko'stini to'g'irlab, yaxshilab ezib aralashtiriladi va yarim soat, bir soat mobaynida muzlatgichga solib qo'yiladi, issiq qiyma qo'rada oqib ketishi mumkin, shuning uchun qiyma muzlatilsa yaxshiroq yopishadi. So'ngra sixni uzun yoki kaltaligiga qarab qiymani 80-120 grammlik bo'laklarga bo'lib olinadi va qo'lni namlab har bir qiyma bo'laklarini sixlab chiqiladi. Sixlab bo'lgach agarda olov tayyor bo'lmasa kaboblar issiq joyda turib bir biriga yopishib qiyma isib qolmasligi uchun to olov tayyor bo'lguncha yana muzlatgichga solib qo'yish tavsiya etiladi. Qiyma kaboblarni ko'mir yonib usti biroz kul qoplagan cho'g' ustiga qo'yib pishirib olinadi, kaboblarning katta yoki kichikligiga qarab 5-8 daqiqa mobaynida pishirib olish mumkin. Pishgan kaboblarni ta'bga ko'ra bezatib biron bir sous bilan dasturxonga tortiq qilish mumkin.
YOQIMLI ISHTAHA!