Ozg'inlik kasallikmi?
Qotmalik aslida kasallik emas. Bu irsiyatga ham bog'liq bo'lishi mumkin. Ba'zi kishilarning suyagi ingichka bo'ladi, to'lishmaydi. Ammo shu bilan birga holsizlanib, sillangiz quriyotgan bo'lsa, bu boshqa gap. Vazn kamayishining ikkita sababi bo'lishi mumkin.
Balki siz avval qandaydir parhez tutgandirsiz. Bilib-bilmay ba'zi mahsulotlarni cheklash, haddan ortiq parhezkorlik ham oshqozonosti bezi, o't pufagi faoliyatini buzadi. Oshqozon torayib, ovqat hazm qilish uchun kislota ishlab chiqarmay qo'yadi. Buning oqibatida anoreksiya kasalligi kelib chiqadi. Aksariyat hollarda, bu kasallik model qizlarda, balerina hamda shou-biznes vakillarida uchraydi. Chunki ular ko'p parhez tutishadi, etarli darajada ovqatlanishmaydi.
Agar siz ilgari parhez tutmagan bo'lsangiz, u holda gastroenterolog hamda dietolog shifokorlar ko'rigidan o'tishingiz kerak va ular maslahatiga ko'ra ish tuting. Biroq bu tomondan ham sizda muammo bo'lmasa, u holda endokrinolog shifokorga murojaat qilishni tavsiya etaman. Ba'zi bemorlarda qalqonsimon bez gormonni me'yoridan ko'p ishlab chiqaradi. Buning natijasida tanadagi assimilyatsiya-dissimilyatsiya jarayoni buziladi. Me'yoridan ortiq gormon oshqozonga tushgan ovqatni «yondirib» yuboradi, moddalar almashinuvi tezlashib, kishining egan ovqati o'ziga yuqmaydi. Bu holda odam ovqat esa-emasa, semirmaydi. Shuning uchun maxsus muolajalar yordamida qalqonsimon bezni davolash tavsiya etiladi.
Agar odam tug'ma oriq, ammo sog'lom bo'lsa, buni faqat vitamin qabul qilish yoki ovqat eyishni ko'paytirish bilan davolab bo'lmaydi. Aslida tug'ma qotma kishilar to'lishish uchun sport bilan shug'ullanishadi va mushaklarni rivojlantirish yo'li bilan bunga erishishadi. E'tibor qilgan bo'lsangiz, harbiy xizmatga ketgan yigitlar oradan bir yil o'tib, baquvvat, kelbatli bo'lib qaytishadi. Bunga sabab, badantarbiya, mushaklarni shakllantirish mashqlaridir. Hozirgi kunda barcha viloyatlarda mashq zallari, sog'lomlashtirish bo'linmalari mavjud. Sport bilan shug'ullansangiz, bu sog'lig'ingizga ham, vazningiz ortishiga ham yordam beradi.