Teri salomatligiga doir maslahatlar
Alloh taolo har birimizga turli xil terini ato etgan, kimdadir u mukammal, kimdadir esa muammoli. Ushbu maqolada biz teri turlarini emas, balki sog'lom teri parvarishi uchun kerak bo'ladigan asosiy qoidalarni ko'rib chiqmoqchimiz.
Go'zal teri ― uning uchun, albatta, qimmat kosmetik vositalar yohud go'zallik salonlariga qatnash emas, asosiysi hayot tarzini o'zgartirish lozim. Biz doimo terimizni parvarish qilamiz, biroq uning ko'rinishi faqat tashqi parvarishga bog'liq emas. Albatta, kremlar terining holatini yaxshilaydi. Lekin uyqu, kayfiyat va hokazolar ham o'z ta’sirini ko'rsatadi.
Quyida sog'lom teriga doir bir necha maslahatlar beramiz:
1. To'g'ri ovqatlanish. Ba’zi yog' turlari terini oziqlantirib, uni ichidan yumshatadi. Masalan, baliq, yong'oq, zig'ir va yashil sabzavotlarda bo'ladigan Omega-3 yog' kislotasi. Yana ovqat va salatlarga o'simlik yog'larining sovuq siqimlisini(xolodnыy otjim) qo'shsa, (masalan, zig'ir, kungaboqar, kunjut va zaytun yog'lari) maqsadga muvofiq bo'ladi.
Holbuki, yog'li, qovurilgan va yarim tayyor mahsulotlar zararli yog'larga to'la. Terining qurishi, yallig'lanishi, yorilishi va yog'li yaltirashi aniq. Shokolad va gazli ichimliklardan ham voz kechgan maqsadga muvofiq. Agar bularning hammasidan voz kechishingiz qiyin bo'lsa, ularning zararli ta’sirini taomingizga limon, zanjabil va kurkuma qo'shish bilan susaytiring. Haddan tashqari ko'p yeyish va doimo parhezda yurish ham terining holatiga yomon ta’sir qiladi.
2. Uyqu. Melatonin haqida hammangiz eshitgan bo'lsangiz kerak. Bu foydali gormondan mahrum bo'lmaslik uchun vaqtida yotib, uyquga to'yish lozim.
3. Ko'proq suv iching. U moddalar almashinuvini tezlashtiradi va terining holatiga yaxshi ta’sir qiladi. Toza havoda sayr qilishni ham unutmang.
4. Teri parvarishi uchun vositalar tanlash. Teringiz turiga qarab vosita tanlang ( tozalovchi, tetiklashtiruvchi, yumshatuvchi). Asosan, tabiiy kosmetik vositalardan foydalaning. Tozalovchi vositalarning aksariyatida laurilsulfat natriy moddasi bo'lib, terining qurishiga olib keladi. Teri parvarishi uchun vositalarni to'g'ri tanlang va ishlatishdan avval tarkibi bilan tanishib chiqing.
