Karving san'ati - haykaltaroshlikmi?
Hozirda to'y-yu tantana, bazmu marosimlarda dasturxon va taomlarni har xil meva va sabzavotlardan yaratilgan ijod namunalari bilan bezatish an'ana bo'lib bormoqda. Dasturxon va taomlarni meva va sabzavotlar bilan bezatish pazandalik sohasida karving deb ataladi.
Karving inglizcha "carving" yoki "curving" - "kesmoq, to'g'irlamoq" bo'lib, "kesiladigan ish", "kesiladigan naqsh, bezak" ma'nosini anglatadi. Daraxtlar, muz, tosh va sabzavotlarni kesish karving deyiladi. Shuningdek, tog' chang'isida uchishning bir usuli va hatto sochning uzoq buzilmaydigan kimyoviy turmak turi ham shunday ataladi.
Karving oshxonada - bu hozirda turli restoran oshpazlari keng foydalanayotgan sabzavot va mevalarning shaklli kesishdir. O'z mohiyati mazmuniga ko'ra ta'rif beradigan bo'lsak, karving bu haykaltaroshlik san'atining eng oddiy shakli yoki oshpazlarning meva va sabzavotlarga o'ymakorlik bilan naqsh solishidir.
Karving tarixidan - Sabzavot va mevalarni kesish san'ati bir necha yuz yil oldin janubi-sharqiy Osiyoda uy stolini bezash zarurati sifatida vujudga kelgan. Tarixda Evropa aholisi taomlarni bezashga ehtiyoj sezmagan. Bu yerda hatto qirollarning taom dasturxonida birinchi o'rinda mahsulotlarning to'la-to'kisligi va taomning mazaligi muhim sanalgan. Keyingi yillarda Sharqiy osiyoning har bir mamlakatida karving o'zining asosiy chizgilarini topib, bir-biridan farq qiladigan jihatlari yaratildi.
Xitoy va Yaponiya ustalarining texnikasi o'xshab ketadi - u yerda ierogliflar, odamlar va hayvonlarning suratini kesish qabul qilingan. Bu ajdaho bilan an'anaviy rasm, tabrik so'zlar va kurashsahnalari bo'lishi mumkin. Tailandning davlat ramzida esa orxideya bor. Shuning uchun tailandlik ustalar meva va sabzavotlardan gulli kompozitsiyalar qirqishni ma'qul ko'rishadi. Ular "tay" pichog'i deb atalgan uzun va mayin pichoqdan foydalanishadi. Hozirda hech bir ko'rgazma yoki mahsulotlar shousi turli xil shaklda kesilgan meva va sabzavotlar bilan bezatilgan dasturxonsiz o'tmaydi.
