Buvimdan eshitgan baxtli oila qurishning 10 siri.

Buvimdan eshitgan baxtli oila qurishning 10 siri.

Men buvimning qiziman. Shunaqasi ham bo'ladi deysizmi? Bo'ladi! Gap shundaki, buvimning olti nafar qizlari bo'lganu, o'g'il ko'rish nasib qilmagan. Shuning uchun kenja qizlarining bosh farzandi, ya'ni men buvim bilan o'sganman. Xolalarim, hatto ba'zan onam ham turmushdan nolib, buvijonimga dardu hasratlarini to'kib solishardi. Shu paytda buvim ularga nasihat berardilar. Nasihatlar olti qizga kamida olti marta takrorlanganidanmi, buvimning gaplari xuddi diktofonga yozilgandek mening xotiramga muhrlanib qolgan ekan. Quyida oila mustahkamligini ta'minlovchi, baxt qasrini qurish uchun ushbu o'gitlarni ayollarimiz bilan o'rtoqlashmoqdaman.

Eringdan kuni qanday o'tgani haqida har kun so'rashni unutma. Har kuni! Bu kundalik odatga aylansin. Hadeb so'rayversam, joniga tegaman deb o'ylama. Unga befarq emasliging shu yo'l bilan namoyon bo'ladi. Keyin u ham sen bilan kundalik taassurotlarini o'rtoqlashishga odatlanib qoladi va so'ramasang ham barini o'zi gapirib beradigan bo'ladi.

Janjallar bo'lib turadi. Ammo ular hamma narsani barbod qilmasligi kerak. Birovni jondan ortiq yaxshi ko'rganing holda uni bir necha daqiqaga bo'lsa ham jiningdan badtar yomon ko'rib turishing mumkin. Hayotda hamma narsa bo'ladi-da. Janjallashgan oila ajrashib ketaversa, yer yuzida oila qolarmidi? Ehtiroslarni jilovlash kerak, janjal paytida ertaga ham, indinga ham, Xudo xohlasa, bir umrga shu inson bilan yashashingni o'ylab gapirgin.

Itoatli bo'l. Oila murosayu madora degani. Yon berishni bilgin. Olaylik, kechqurun u futbol ko'rmoqchi, sen esa serial. Bitta seriyasini ko'rmasang, osmon yerga uzilib tushmaydi. Eringga ber televizorni. Iloji bo'lsa, qiziqmasang ham birga o'tirib ko'r shu futbolni. Bu er-xotinni yaqinlashtiradi.

Doim eringni ustun qo'y. Dugonalaring bilan to'yga borish yoki ering bilan uyda yolg'iz qolib, kechki taomni birga yeyish - qaysi birini tanlaysan? Dono ayol hamisha ikkinchisini tanlaydi. Chunki, to'ylar ko'p bo'ladi. Bola-chaqali bo'lgach er-xotinning yolg'iz qolib suhbatlashishi esa tobora noyoblashib boradi.

Qayin-bo'yningning hurmatini joyiga qo'y. Eringning qarindoshlarini o'zingnikidek ko'r. Birga tursang, doim xizmatlarini qil. Ro'zg'oring bo'lak bo'lsa, kunda bir marotaba qo'ng'iroq qilib qaynonangning ahvolini so'ra.

Eringdan shirin so'zingni qizg'anma. Yaxshi ko'rishingni to'g'ridan-to'g'ri aytolmasang, shirin so'zing, muloyim muomalang bilan ko'rsat. Yaxshi gap hech qachon ortiqchalik qilmaydi.

Eringning qoshida parvona bo'l. Ering betobligida bolangning atrofida qanday parvona bo'lsang, uning ham boshida shunday parvona bo'l. Kasal erni uyda qoldirib to'y-hashamga ketadigan ayolga suf. Issiq jonmiz, o'zing xastalansang, birovning parvarishi va e'tiboriga muhtoj bo'lishingni o'yla.

Uy ishlarining aksarini ering uyda yo'qligida bajar. Erkak kishi changyutgich va kirmoshinaning ovozini yoqtirmaydi, yana anavi soch quritadiganning ham. Shu ishlarni uning oldida qilma, toki asl halovatni uyidan topsin.

Eringni ortidan yomonlama. Birov uni yomon desa, darrov og'ziga ur. Yaxshidirki, unga xotin bo'lib yuribsan. Ishon, keyin birov eringni yomon sifat bilan tilga olib, sen falonchining xotinisan desa, o'zingga alam qiladi.

Eringdan so'ramay uydan bir qadam ham chiqma. U istamagan libosni kiyma. Uydan eridan beso'roq chiqqan ayolga to qaytib kelguncha farishtalar la'nat o'qib turishar ekan. Xullas, uning senga ma'qul kelmagan jihatlarida ham fazilat bor. Izlasang, topasan. Baxtli bo'ling azizlar. Men baxtliman deyish barcha qizlar va ayollarimizga nasib qilsin. Siz bilan doimo Oq-Ayiq.Net.