Erkakning daromadini ayoli bilishi shartmi?
Xalqimizda ajoyib bir naql bor, "erkakning topgan bir so'mi ayolning topgan ming so'midan barakali bo'ladi!". Bu gapga hech kim qarshi fikr aytmasa kerak. Erkaklar rafiqasidan har kuni "omad yor bo'lsin, beraridan qismasin, topganingizni barakasini bersin" degan tilaklarni eshitishni xush ko'rishadi-yu, ammo nima uchundir, ana o'sha niyatlar ortidan topilgan pullarini yashirashadi ham. Nozik hilqat vakilalari esa buning sababini bilolmay qolaverishadi. Aynan shu haqida erkaklarning ochiq-oydin iqrorlaari bilan tanishamiz!
"KERAK EMAS. "O'PIRIB" TASHLAYDI!"
Yodgor SA'DIYEV, O'zbekiston xalq artisti: - Erkak oilaning boshlig'i hisoblanadimi?! Demak, xo'jayin hech kimga hisob berishi shart emas. Qancha pul topishi-yu, uni nimalarga sarflashi haqida xotini va bolalari bilan hisoblashmaydi. Ming yillik naql bor, "Uzumini yegin-u, bog'ini surishtirma", bu ayni haqiqat! Undan keyin ayolga pul bersangiz bormi, orqa-oldiga qaramay ishlatib, tog'dek boylikni ham o'pirib tashlaydi.
"BETINGIZGA EMAS, QO'LINGIZGA QARAYDI-YA!"
Sanjar SHODIYEV, aktyor, rejissyor: - "Xotining gapini ikki qilma, lekin gapiga kirma" degan gap bor. Xotinimga hamma narsani aytsam ko'chada qanday yuraman axir?! Erkak kishi 100 yoshga kirganida ham xotining oldida sirli bo'lishi kerak. Aqlli ayol erining daromadini tahlil qilmaydi, balki qo'liga berilgan pulni o'rnida ishlatadi. Xudoga shukr, bizning oilada shunaqa.
"O'NDAN BIRINI AYTAMAN".
Umar SHAMSIYEV, xonanda: - Rafiqamga topgan daromadim haqida umuman aytmayman. Buni o'zim bilsam bo'ldi, shuning o'zi yetarli emasmi? Menimcha, erkak xotiniga daromadi haqida bor gapni aytaversa, topganining barakasi uchib ketadi. Tajribamda bu holat ko'p bora sinalgan. Daromadimning 10 foizinigina rafiqam ko'radi, xolos. Qolgan 90 foizi haqida bilmaydi. Ona, opa-singil, turmush o'rtog'i, qizi, xullas, ayollarni erkak kishi pul masalasiga aralashtirmasligi hamda ularning qayerda saqlanishini aytmasligi kerak. Men bu bilan keliningizga umuman pul bermayman, demoqchi emasman, kerakligini doim qo'liga tutqazaman. Asosiysi, erkak oilasi va yaqinlarining moliyaviy ehtiyojini butunlay ta'minlab berishni unutmasligidir. San'atkorman, yangi qo'shiq yozish, klipni suratga olish, uni TV hamda radioda mudom "aylanib" turishi uchun ham mablag' sarflanadi. Bu ishlarga qancha pul ishlatganim haqida uyda umuman og'iz ochmayman va buni to'g'ri deb hisoblayman.
"AYTMAY, SERHARAJATLIGIGA QARSHI KURASHAMAN!"
Rufat NE'MATOV, jurnalist: - Erkak oylik maoshining miqdorini, qo'lida qancha puli borligini xotiniga aytmagani ma'qul. Faqatgina qisman gapirib bersa bo'ladi. Masalan, oila boshlig'ining maoshi 1 million so'm bo'lsa, shuni 600 ming so'm deb aytgani yaxshi. Juda ko'pi bilan daromadning 70 foizini ko'rsatishi lozim. Bu yolg'on emas, aslo! Shunchaki bu ish ayollarning serharajatligiga qarshi kurash bo'ladi. Ayollarga pulning cho'g'ini qanchalik kamaytirib ko'rsatsangiz, shuncha yaxshi. U o'zini turli sarf-harajatdan tiya boshlaydi, iqtisod qilishni o'rganadi. Ayollar psixologiyasi g'alati, bozorga tushsa, ertangi kunini o'ylamay, qo'lidagi hamma pulini ishlatib chiqadi. Egniga yangi chiroyli ko'ylakni kiyadi-yu, ammo puli yo'qligidan tushlik qilmaydi. Biz esa bor haqiqatni aytmay, mana shu kabi holatlarning oldini olamiz. hamda oilada jamg'arma paydo bo'lishiga zamin yaratamiz.
"100 % AYTAMAN!"
Javlon SHODMONOV, aktyor, rejissyor: - Xotinim qancha pulim borligi haqida 100% foiz ma'lumotga ega. Chunki menda pulni yashiradigan odat yo'q, undan keyin er-xotin o'rtasida sir bo'lsa, ishonch yo'qoladi. Ammo bu daromadimni qayerga ishlatishim, qanday taqsimlashim haqida tushuntirish beraman degani emas. Ba'zan shunday katta harajatlar bo'ladiki, ular haqida ogohlantirmay ilojingiz yo'q. Xullas, vaziyatga qarab ish tutaman. Ro'zg'or, oila, bolalarning barcha ehtiyojlarini ta'minlab qo'ysangiz, ayolingizning pulingizga hisobchilik qilishi xayoliga ham kelmaydi.
"BU YASHIRADIGAN SIR EMAS!"
Fathulla TOSHMATOV, sahifalovchi dizayner: - Erkak kishi ertayu kech tinmay mehnat qiladi. Nima uchun? Oilasining istiqboli, farzandlarining kelajagi uchun, albatta. har qaysi erkak ham topganini uyiga olib borishiga ishonaman. Axir bolalari va oilasidan qisib, ko'cha-kuyda sarf-harajat qilishga kimning vijdoni yo'l qo'yardi. Ayol kishi shuni tushunishi, bilishi shart! Erkak ko'chaning odami, u kun davomida turli xil vaziyatlarga ro'baro keladi. Yonida puli bo'lmasligi esa mumkin emas. Xotiniga ham erining kundalik xarajatlari qiziq bo'lmasa kerak. "Izquvarlar"ga esa maslahatim, boshingizni bu mayda-chuyda fikrlar bilan og'ritmang!
"HECH QAChON AYTMAYMAN"
Ismini sir tutgan ERKAK: - Xotinim daromadim haqida 100 % ma'lumotga ega emas. harajatlarim haqida ham aytib o'tirmayman. Lekin jamg'armamni faqatgina unga ishonaman. hozir mashina sotib olish uchun pul yig'yapman, avvallari pulimni onamga ishonardim. Bir-ikki marta jamg'armamdagi pullarni onam bozorda singlimning kiyim-kechaklari, ukamning o'qishidagi muammolari uchun ishlatib yuborgan va bu haqida meni umuman ogohlantirmagan. Bundan ochig'i biroz ranjidim, axir men ikki joyda ishlab, o'zimdan, bolalarim va rafiqamdan qisib pul yig'ayotgandim. Shundan keyin volidamga biror qarshi so'z aytmay, topganimni o'zimda saqlaydigan bo'ldim. Xotinim qancha pulim borligi va u qayerda turishidan xabardor. Biroq jamg'armaga mening ruxsatimsiz qo'lini ham tekkizmaydi. Ularni ko'z qorachig'idek asrashga harakat qilishiga ishonaman.
Dilnoza MIRTOLIPOVA yozib oldi.