Jonim senga gapim bor.
Ruxshunoslarning ta'kidlashlaricha, umr yo'ldoshingizning kayfiyati, istaklariyu ko'nglidan nimalar o'tayotganini uning xatti – harakatlariga qarab bilib olishingiz mumkin ekan. Mimika va pantomimika sir – asrorlarini puxta egallang demaymiz, hech bo'lmaganda kundalik turmushda asqotadiganlari bilan tanishib qo'ysangiz, foydadan xoli bo'lmaydi. Xo'sh, nima dedingiz, erkaklar psixologiyasini o'rganish bo'yicha mashg'ulotimizni boshlaymizmi?
Biz tomonga qiyo boq...
Ishdan qaytgan eringiz tamaddi qilgach, yoningizga keldiyu, harakatlaringizni kuzata boshladi. Diqqat qiling, agar uning gavdasi siz tomonga qaratilgan bo'lsa, bu yashirin belgidir, oldinda shirin visol onlari kutmoqda. Bordiyu bir necha kun oldin arazlashib qolgan bo'lsangizu, yoringiz siz tomonga qarab, oyoqlarini chalishtirgan yoki bittasini oldinga tashlab olgan bo'lsa, yarashish niyatida ekanligini bildiradi. Ko'pam kuttirmay sulh imzolashga rozi bo'lavering.
Gavdasini tik tutsa...
Turmush o'rtog'ingiz tez – tez elkalarini ko'tarib, bilaklarini bir – biriga tekkazib qo'yadimi? Balki qo'llarini yuqoriga yoki yon tarafga harakatlantirar ham. Agar shunday bo'lsa bilingki, suyukligingiz shirin so'z va maqtovning gadosi. Uni ko'proq maqtab turing. Xayoli parishon... Gohida shunday bo'ladi, eringizga gapiraverasiz, gapiraverasiz u bo'lsa o'z dunyosida sayr qilib yuraveradi. Diqqat qilsangiz, goh barmoqlarini qarsillatgan, goh ko'ylagining tugmasini o'ynagan. Bu undagi sarosimadan darakdir. Ayni vaziyatda ro'zg'or tashvishlariyu, muammolar bilan chalg'itmang. Baribir kutgan natijangizga erishmaysiz.
Bamaylihotir...
Agar eringiz oyoqlarini kerib o'tirgancha televizor tomosha qilayotgan bo'lsa, yangi ko'ylak uchun pulniyu dugonalaringiz bilan charllariga borishni so'rab oling. Bu holat erkakning xotirjamligini bildiradi. Agar sizni ko'rgach oyoqlarini chalishtirib olsa, «haddingizdan oshmang» degan ma'noni uqing. So'ramoqchi bo'lganingizni so'rayvering, ammo me'yordan oshib ketmasin.
Hali u yoqqa hali bu yoqqa...
«Biror nima kerakmi?» u xonadan bu xonaga kirib – chiqib yurgan eringizga hayron bo'lgancha savolga tutasiz. Aslida esa uning xohishi sizni tezroq bag'riga bosishdir. Shunga ham atrofingizda parvona bo'lib, o'ziga xos ishora berayapti. Ochiqdan – ochiq aytolmayotganiga ajablanmang. Axir hamma erkak ham hissiyotlarini dasturxon qilavermaydida.
